Амьдралдаа хэр амжилттай байснаас тань бус, харин төсөөлшгүй энэрэнгүй, хайраар дүүрэн МАПА болох Төгс Хүчит БУРХАНЫ хүүхэд учраас таныг хэмжээлшгүй их хайрладгийг мэдэж аваарай.

Энэтхэгээс Ааюши-ийн энэтхэг хэл дээр ирүүлсэн сэтгэлийн үгийг олон хэлний хадмал орчуулгатайгаар одоо хүргэе:

Үзэсгэлэнт Их Багш минь, миний Гүрү, хамгийн эрхэм, хайртай Оршихуй минь, Танд баярлалаа. Би Танд хайртай. Үргэлж дэргэд минь байж, Таныг танин мэдэх цаг хугацаа, орон зайг надад олгож байдагт баярлалаа, Их Багш аа. Та үргэлж дэргэд минь байсан; Та ямагт байсаар ирсэн. Дахин дахин мартчихдаг нь харин би өөрөө юм. Биднээс болж Та ийм их зовлон шаналлыг туулж байгаад үнэхээр харамсаж байна. Сайн авшигтан байж чадаагүй, өдөр бүр 2.5 цаг Арьяабалын бясалгалаа хийгээгүйд уучлаарай. Би өөрийгөө сайжруулахыг хичээж байна. Би дахин худал амлалт өгөхийг хүсэхгүй байна, гэхдээ би сайжрах болно. Таны Хайр, тэвчээр, сайхан сэтгэлд баярлалаа. Их Багш маань биднийг хамгаалдаг шиг Их Багшийг минь бүхий л сөрөг биетээс үргэлж хамгаалаач хэмээн Эргэн Нэгдсэн Цаглашгүй Хүчирхэг Гуравт би залбирдаг. Мөн би амьдралдаа ганцхан удаа ч болов Тантай учран золгож, Таныг харах ерөөл, хувь тохиож, зүрх сэтгэлийн минь энэ хүсэл биелээсэй гэж залбирдаг.

Би нэгэн явдлыг хуваалцмаар байна. Би Их Багшийг дагадаг байсан ч, авшиг хүртэх талаар хараахан бодоогүй байлаа; Би бэлэн болсон эсэхийг минь БУРХАН надад нэгэн тэмдгээр мэдүүлэхийг даатгаж, Түүний дохиог хүлээж байв. Ууланд миний өмнө нь байнга очдог байсан нэгэн газар байдаг бөгөөд тэнд Төвөдийн олон лам нар мөн амьдардаг. Намайг ойд ганцаараа сууж байхад нэг лам хажуугаар өнгөрөв. Би түүний хэлийг ойлгож чадаагүй ч, хийж буй үйлдлээс нь тэр намайг тулгуур болгох нэгэн саваа аваад цааш яваарай гэж дохиж байгааг нь ойлгосон. Тэр инээмсэглэн мөнөөх үйлдлээ үргэлжлүүлэн хийсээр байгаад, дахин инээмсэглээд цааш явсан. Олон жилийн турш, өнөөг хүртэл нэг ч лам надтай ярихаар зогсож байгаагүй тул би ихэд гайхширсан. Тэгээд энэ нь миний хүлээж байсан тэмдэг бөгөөд ганцаараа цааш явж чадахгүй гэдгийг БУРХАН надад ийнхүү мэдүүлж байгаа болохыг би ойлгосон; Надад Их Багшийн дэмжлэг хэрэгтэй байв. Тэр мөчид би асар их ивээгдэж, хамгаалагдсанаа мэдэрч, авшиг хүртэх хүсэлт гаргахаар шийдсэн. Авшиг хүртэхийн өмнөх өдөр нь би зөв зүйл хийж байгаа эсэхээ дахин өөрөөсөө асууж эргэлзлээ. Сэтгэл минь ихэд тогтворгүй байлаа. Харин авшиг хүртсэн өдөр би туйлын жаргалтай, эрх чөлөөтэй, ивээгдсэн, сэтгэл үнэхээр хөнгөн болсон мэт санагдсан. Баярлалаа, Их Багш аа. Та бол Хайр, Та бол Гэрэл. Мөн Та бидэнд тусалж, өөрсдийгөө улам сайжруулахыг хүсэхэд хүргэдэг. Хүндэтгэсэн, Энэтхэгээс Ааюши

Итгэл дүүрэн Ааюши, сэтгэлийн үгээ илгээсэнд баярлалаа.

Их Багш энэрэнгүйгээр хариулжээ: “Үнэнч Ааюши минь, энэ дэлхийд сүнслэг бясалгал хийх нь маш их бэрхшээлтэй байдаг тул өөрийгөө бүү шүүмжилж, буруутга. Өдөр бүр өөрийгөө дахин зоригжуулж, шинээр эхэл. Амьдралдаа хэр амжилттай байснаас тань бус, харин төсөөлшгүй энэрэнгүй, хайраар дүүрэн МАПА болох Төгс Хүчит БУРХАНЫ хүүхэд учраас таныг хэмжээлшгүй их хайрладгийг мэдэж аваарай. Үүнийг чин сэтгэлээсээ санаж яван, энэ нь танд хүч чадал өгөхийг зөвшөөр. Тэгвэл БУРХАНЫ сүр жавхлангийн өмнө саад бэрхшээл бүхэн өчүүхэн төдий хуурмаг үзэгдэл гэдэгт бат итгэлтэйгээр бүгдийг даван туулж чадна. Та өөрийгөө бодож байгаагаасаа хавьгүй илүү хүчтэй. Чин үнэнчээр замаа үргэлжлүүл, үлдсэнийг нь БУРХАН зохицуулна. Та болон сэтгэл баясгам Энэтхэгийн ард түмэн дотоодын Тэнгэрлэг Гэрлээ сэрээж, үүрд Хайрын мөн чанараар амьдрах болтугай. Миний Хайр бол Гэртээ харих аяллын замыг тань гэрэлтүүлэх дэнлүү юм!”